2017/05/16 刊登於TOPick 經濟日報 (圖片:TOPick)


上篇說到Mall姐級腦細的五個特徵。若你不幸遇上，在決定去買兇殺佢之前，睇埋這篇睇下幫唔幫唔到手。
與方丈拆招同處理分手一樣，不可能不受傷，只希望把傷勢減至最低。以下兩個劍法同一個心法或者可以

幫方丈從天空返回地面
遇著方丈的要求比天高或者話變就變，可分階段與方丈共議，例如開工之前摸底傾清楚他的期望和收貨位，盡量把標準從天空 （例如幫我執靚佢），帶到地面 （例如個heading用晒紅色O唔OK？）。
還要把雙方已達成協議的寫下來（或挑成木刻）存檔，cc方丈一份少不了，特別是遇上腦退化之腦細，以備日後對數，避免他說：「我冇咁講過！」。
到工作進行了約三份一至一半，向方丈匯報一下進度和暫時成果，看看方丈面色有冇由紅變黑，如果唔啱胃口，再煮過也不至於total loss。或者他又發病，唔認自己講過或者唔知自己想點，家陣也來得切拆掂佢。

了解方丈的情意結
同腦細工作了一段時間，最重要是記低他老人家的口味和情意結，有些腦細重視format，有些一定要有figures support，這些genes好穩定，不會常變。每次你交功課，他必看有否達標。
如果你滿足了他的情意結，他會覺得你上心上力，和他是同一級數的高人。相反的話，他的燥狂症就會被誘發出來！
所以有需要為方丈做張excel表，記低他的like同dislike，要交功課便要到此做次掃瞄，以免出事。同一道理，也要順手為女友做番張like爆與鬧爆的對照表。

相信塵世間有報應
我曾經說過跟惡方丈有好下場，因為惡死方丈通常有要求同有料，會培養出fit馬，正所謂有付出有回報。不過如果去到一個位，每天你返工都活於恐慌之中，回到家中都轉唔到個放工mode。
你做什麼，方丈仍是不收貨加100GB燥底，況且他更是bipolar一念無明，或certified 卸膊無底線的話。那麼quit無懸念！
明嘅，知你剛上車和個B得三個月大，quit不是選項，而方丈卻是惡形惡相朝令夕改拗底賣友兼著衫仲有少少娘咁天地不容，那麼你堅要相信八個字：因果循環，報應不爽！

家陣係唔係好番少少？