傳媒報道

社會氣氛差，最近城中有個Campaign「你有幾OK」，關注港人精神健康，很值得在此談談。我們平時問人「你點啊？」，當事人無論情況幾差，一般都只會答你OK。如果問人「你有幾OK？」對方則傾向易於表達心中所想。

建構對話平台

假如面對面問顯得尷尬，可以借助sticker。以往，當一個人唔ready回應關心的message時，或者會回覆thanks for asking，加報以微笑。下次當你觀察到同事神色不對，平時次次都join lunch，呢排見佢獨lunch，連出入搭電梯都好耐無撞見佢，思疑他是否刻意避見人，你可以嘗試以下方法：

設計對白：見你近排成日面青青，我估你想一個人靜靜地透下，你覺得點啊？

反面教材：咦！成個星期無一齊lunch了，你想一個人食？

用開放式問題，就算對方擠牙膏式回答，起碼願意對話。相反，封閉式的yes no question，容易令人落閘轉身就走，浪費對話機會。

假如讓我接下去

又如果話題可以繼續落去，有3招打工仔可以活學活用：

1.給情緒貼紙：講出對方感受，被明白的感覺係好high。

2.反映式傾聽：只有認真聆聽，才能易地而處，慢慢你甚至識得將內容整合再重複道出，而不是錄音機般重複；不會只說「嗯」、「明白」，甚至不知如何接下去。

3.不加以批判：不單止不就對方的見解作出批評，即使對方的感受也不加以否定。

同事一旦感到被明白，便放心向你表達負面情感及不怕被批評而受挫；另一方面，當人激動時會難以清楚地思考，而反映式傾聽可以幫當事人從比較理性的角度來看問題；而把情感認出來，可以幫助他們了解自己的情感。這3招環環緊扣，不會一步登天，須反覆練習。

最後，有時對話到某一個點，無須再勉強回應時，你都可以畀個hug、「抱抱」、「會過去的……」「喊都好正常」、「我撐你」sticker，關心而不肉麻，對有需要的同事來說已經好窩心。

文：基督教家庭服務中心「盈力僱員服務顧問」

按此即睇完整原文