传媒报道

返工需要智慧，做人上司更需要大智慧。所谓「十隻手指有长短」，连孖生兄弟性格都可以各走极端，更何况工作上黎自唔同背景嘅同事？带住成班手足做嘢，点样可以做到公平服众真係会考起人，而家就等职场专家醒各位新手上司几招啦！

盈力僱员服务顾问首席顾问孙立民指，要令下属感到上司处事公正，并非事事安排到「人人有份」咁简单：「要达至公平可以运用两种手段，一种係平均主义，另一种係应得主义。」至于几时要用边一种，孙立民就指要视乎上司「分饼仔」时係分咩「饼」，简单黎讲就有以下几款「饼」：

1. 金钱回报 + 晋升机会

加人工、佣金、分红以及升职等最直接嘅奖励，当然要用应得主义划分，因为咁做细嘅先有动力工作㗎嘛！

2.进修/培训机会

下属嘅努力值得得到机会，作为上司梗係要撑佢畀多啲支援佢，等对方获得更大进步啦！同时，部份职位需要掌握专门技能黎提升表现，例如让餐厅员工学习更多酒类知识。只要相关培训係职位所需嘅技能，上司就应该要比下属报读。但除咗同事应得，一啲普通嘅职业技能，例如学习普通话咁，都係同事们可以人人提升嘅技能。所以遇上有进修/培训机会，上司就要平均同应得主义并用啦。

3.重要的事业机会

见大客、跟大project、出trip....阿A想去，阿B又想去，争崩头点搞呀？用应得主义，边个叻就畀边个去就唔驶多解释，但作为一个公平嘅上司，亦唔好忘记要用平均主义比其他同事一个「出头天」。因为一个健康嘅团队唔应该机会永远只係畀某部份人攞晒，虽然佢地可能係精英，但如果好嘢永远畀晒佢地，条team嘅「贫富悬殊」差距就会越黎越大，做成叻嘅同事越叻，能力一般嘅同事就因爲欠缺机会而越弱，咁就唔係一个健康嘅发展啦！所以一啲挑战性一般嘅机会，例如每年都有的trip，上司就应该畀同事轮流尝试。

4.褔利

中秋派月饼、节日有coupon、公司T-shirt或风褛等等，但凡只要係员工身份就应有嘅福利，毫无疑问应该用平均主义，人人有份皆大欢喜，做上司嘅就唔会因为分配不均而畀人话「大细超」啦。

5.友好关係

除咗以上种种，一个上司仲可以派咩「饼」畀下属呢？作为上司，你有无谂过同边个同事食晏、放工同边个happy hour、下个礼拜约边个行山，其实都係一种「offer」，对下属黎讲都係一种非金钱量化嘅回报呢？无一个下属会唔想同上司保持良好，甚至係友好关係，如果上司开放呢个机会，下属会恩然视之为一种回报。所以「做朋友」都係一种要妥善管理，影响同事感觉公平与否嘅微妙关键之一。

简单举例，上司去完旅行返工派手信必需要人人有份，而且要份量、质量均等，因为呢啲位搞唔好就会畀人传出去「阿头淨係锡边个」，「偏私」之名就会不胫而走。

不过问题黎啦，当下属有不同长处，上司编派不同工作时，同事们未必「心水清」知道原因，可能只会觉得偏私或唔公平，咁上司可以点拆？孙立民教：

「无论如何，同grade同事的工作量在牌面上理应係差唔多的，不过hea嘅同事你唔敢畀嘢佢做，结果做死晒勤力/叻嘅同事，呢啲情况好普遍。对于hea爆同事，你梗係唔敢委以重任，但对于能力高嘅同事，做上司应该要令下属睇到前景，而唔係无希望咁捱，同时要为佢争取更好待遇，否则『fit马』迟早一日递信走人，损失嘅都係自己。」

能够做到「人人都buy」可以话係做上司嘅最高境界，各位师兄由今天起慢慢边做边学啦！