传媒报道

朱伯母，你好！

我係你个仔阿Tom嘅上司，你唔洗咁紧张，Tom冇俾公司炒，亦唔係性骚扰女同事。同你讲声唔好意思，公司俾左好多工作阿Tom做，令你好少机会见到佢。我通常7点走，差不多每次放工仲见到佢留喺公司博杀。

我知道世界上起码有两个女人等梗佢放工，就係佢女友同伯母你。我叫过佢早啲走唔好留咁夜，正所谓长命工夫长命做。我都知咁讲好假，边个唔想准时放工，啲嘢未做晒点走，老闆未走更加唔敢闪。

不过我知道每晚等阿仔回来吃饭的心情几咁差，啲餸冻晒，翻叮啲鱼又腥。拿好拿面，一路等一路咀咒个脑细，望阿仔转工…..，我点知？我见到我太太咪知！

记得有一次Tom朝早9点半至返到公司，我叮佢入房照肺，其实我都唔想，因为Tom返工极少迟到，迟咁多是绝无仅有，而且他绝不是Hea的同事。但我地係open office，全世界都睇到，我唔扮黑面照佢肺，对其他同事唔公平。

Tom十分歉咎，say sorry左十数次，但没有说过一个藉口。后来从同事口中得知，当天是伯母发烧，他急着要陪你去看医生。不知伯母你现在好番未？但我好欣赏他承担的精神，对于一个九十后的年青人来说，是极难能可贵的资产，回报率肯定高过入左几手平安好医生。

他处事用心，每次遇到难题，总会自己去解决困难，个客say no、project唔够budget、contractor 扭计…..，佢都自己赤手空拳去handle，游说下个客、自己去r啲sponsor、冧下个contractor…..，公司的困难问题，放係佢枱面多过放喺我张枱。但佢只不过嚟左两年，已经成个甄子丹咁一个打十个！

开会倾啲新project，要搵同事跟，一问边个想做，呢个时候总会有一两个去厕所，两三个扮复电话，三四个会话家阵已经好多野要跟，其馀的都低下头，避免同我有眼神接触。此时空中会有一隻手举起，我认得那是阿Tom的手。我未见过咁热血嘅后生仔，有时我会怀疑他是否地球人！

当然，跟着的两个礼拜，Tom又会好迟至走！

Tom在公司的人缘也很好，不是因他靓仔小鲜肉，最重要喺佢唔计较，抵得谂，有次我见到有个同事去蒸馏水机斟水，发现冇水，佢竟然返番埋位，当冇去过凶案现场。跟住Tom也出去斟水，他见冇水，二话不说，抬起有几个哑铃重的蒸馏水樽换水。平时影印机加纸，printer换炭粉，入lift hold住lift门，果个一定係阿Tom。

你个仔高大得嚟又有少少怕丑文青feel，有礼貌，朝早会主动叫人，同事向他讲唔该，佢一定会说唔洗客气。有熨恤衫，打呔会扣喉钮，竟然用手拍不用纸巾。再加上佢又熟excel识整电脑听讲拉得一手小提琴，真係冇得输。女同事每日都围住他在转，我开始为Tom的女友担心，讲笑啫，相信Tom是一个专一有责任感的人。

伯母，我想同你讲，你个仔坚打得！我望住呢个外星人，问点解咁唔同。相信离不开两个原因：遗传同家教。anyway，都是伯母的功劳！(当然朱世伯也有credit！)

不过伯母有一件事，我唔知应唔应该同你讲，昨天我接到阿Tom的辞职信，佢话有间跨国公司，俾左个唔错嘅offer。我知道斗薪酬同package，我地好难斗。阿Tom坚係我地做管理的dream staff，如果佢肯留低，相信不出两三年，佢必是公司的no. two，会有好大自由度去决定公司的路向和市场策略，成就感肯定大过踎係大公司做中层。

我会加多人手，阿Tom以后唔会迟过7点钟番到屋企同伯母食饭。或者你今晚可以同佢倾下，当然，唔一定要讲俾佢知我打过嚟。

按此即睇完整原文