回應策略
如何回應親戚們的問題，視乎他們的發問動機。我們可以從觀察和相處經驗來判斷，例如一向疼愛你的慈祥長輩可能是出於關心，愛說是非的疏堂親戚多數是出於八掛！如果對方的發問出於關心，大家回應時可以反映自己並無遇上問題，減少對方牽掛；如果對方的發問出於八掛，大家回應時可以反映自己感覺良好，不認同對方的負面假設。
不過，新年最緊要和氣生財！如果大家不明對方發問的動機，建議大家一律當他們出於關心，同樣可以大方得體地回應他們。
8條常見問題
1. 你舊年畢業，到依家仲未搵到工呀？
回應關心：我係要求高啲啫！再搵唔到先降低要求都未遲。你唔駛擔心！
回應八掛：我又無你咁心急搵錢喎！作為我人生第一份工作，梗係要揀一份百分百合適、又有得發展的，我仲未遇到。
2. 你一個月人工有幾多呀？
回應關心：總之夠使兼夠比家用！你唔駛擔心啦！
回應八掛：多謝你咁關心我！市價都係萬幾至幾萬啦！明年可能有人工加，暫時都未知加幾多？
3. 今年加咗幾多錢人工？派幾多個月花紅呀？
回應關心：有嘅有嘅！公司通常跟市場走勢，間間都加少少派少少咁啦！
回應八掛：乜你真係會周圍同人講呢啲私隱架咩！你都係學吓點保障私隱好啲喎！
4. 咦，你仲係做主任，xx同你同一行，但佢依家已經係高級經理……
回應關心：我在公司裡，做到主任已經好好，我滿足啦，仲做得幾好。
回應八掛：間間公司的政策唔同，我唔會同外面啲人比較嘅，多謝關心！
5. 點解你仲未轉工，你哋啲後生仔唔係興成日跳槽既咩？！
回應關心：我份工做得好開心、有前途又穩定，暫時毋須跳槽！
回應八掛：吓！我同期同學唔興㗎喎，我唔係嗰啲咁唔穩定嘅人。
6. 吓，你又轉咗工？仲轉咗行？成日咁跳，點解嘅？
回應關心：我只係想趁年輕試多啲野，我可能仲會試多幾行，唔駛擔心。
回應八掛：我係一隻無腳的雀仔，我開心咪得。
7. 而家個市咁差，周圍都裁員，你份工穩唔穩陣？
回應關心：你都話係市道差啦！我而家就無問題，但將來的事我唔知，不過你放心啦！我識點處理嘅。
回應八掛：唔知㗎！乜你好驚你份工唔穩陣咩？
8. 聽講你做個行接觸到好多內幕消息，有冇料爆呀？
回應關心：公司有指引，員工不能洩露內幕消息架！我想講俾你知都唔得呀！
回應八掛：你點睇我都唔似係會出賣公司嘅二五仔啦！唔好意思呀！無可奉告。
KO盤問陷阱
當遇上求知慾旺盛的親戚不斷盤問你的狀況，令你覺得難為情，以下3招可以救你出困局。
第1招：先發制人
若不想成為被討論的對象，先取得主控權不斷問對方問題，令對方成為話題的主角，自己便不用回答太多私人問題了。例如：我反而有興趣你嘅工作喎，不如你講下自己先啦！你份工點㗎？有冇機會升職呀？
第2招：轉移話題
當被問及私隱，你面對長輩的關心又難以拒絕作答，難免出現尷尬場面。建議準備幾個埋身的熱門時事話題，打岔一下。例如：呀！講開又講，你地有冇了解過垃圾徵費嘅政策呢？你地有咩準備呀？
第3招：Time Out
當遇上難以應付的親戚，不斷地盤問，甚至令你感到焦慮不安。唯有出最後絕招，以咳嗽、喉嚨痛、唔舒服等借口，表示要離開一下。這樣中斷話題，可以讓親戚察覺你的反感，令他們收斂行為。
作者_吳慧琪小姐 (Wicky)簡介：
吳慧琪(Wicky)為基督教家庭服務中心『盈力僱員服務顧問』的高級經理，擁有社會工作榮譽學士和工商管理碩士，也是一名註冊社工。Wicky 從事僱員輔導、企業培訓及管理顧問工作超過20年，曾為多間企業提供僱員支援計劃(EAP)的顧問服務。她對職場生態有獨特見解，曾接受多間傳媒訪問，分享職場話題和應對策略。
更多職場Chill Up的文章請按此
按此查看報導原文
