朱伯母，你好！

我係你個仔阿Tom嘅上司，你唔洗咁緊張，Tom冇俾公司炒，亦唔係性騷擾女同事。同你講聲唔好意思，公司俾左好多工作阿Tom做，令你好少機會見到佢。我通常7點走，差不多每次放工仲見到佢留喺公司博殺。

我知道世界上起碼有兩個女人等梗佢放工，就係佢女友同伯母你。我叫過佢早啲走唔好留咁夜，正所謂長命工夫長命做。我都知咁講好假，邊個唔想準時放工，啲嘢未做晒點走，老闆未走更加唔敢閃。

不過我知道每晚等阿仔回來吃飯的心情幾咁差，啲餸凍晒，翻叮啲魚又腥。拿好拿面，一路等一路咀咒個腦細，望阿仔轉工…..，我點知？我見到我太太咪知！

記得有一次Tom朝早9點半至返到公司，我叮佢入房照肺，其實我都唔想，因為Tom返工極少遲到，遲咁多是絕無僅有，而且他絕不是Hea的同事。但我地係open office，全世界都睇到，我唔扮黑面照佢肺，對其他同事唔公平。

Tom十分歉咎，say sorry左十數次，但沒有說過一個藉口。後來從同事口中得知，當天是伯母發燒，他急著要陪你去看醫生。不知伯母你現在好番未？但我好欣賞他承擔的精神，對於一個九十後的年青人來說，是極難能可貴的資產，回報率肯定高過入左幾手平安好醫生。

他處事用心，每次遇到難題，總會自己去解決困難，個客say no、project唔夠budget、contractor 扭計…..，佢都自己赤手空拳去handle，遊說下個客、自己去r啲sponsor、冧下個contractor…..，公司的困難問題，放係佢枱面多過放喺我張枱。但佢只不過嚟左兩年，已經成個甄子丹咁一個打十個！

開會傾啲新project，要搵同事跟，一問邊個想做，呢個時候總會有一兩個去廁所，兩三個扮覆電話，三四個會話家陣已經好多野要跟，其餘的都低下頭，避免同我有眼神接觸。此時空中會有一隻手舉起，我認得那是阿Tom的手。我未見過咁熱血嘅後生仔，有時我會懷疑他是否地球人！

當然，跟著的兩個禮拜，Tom又會好遲至走！

Tom在公司的人緣也很好，不是因他靚仔小鮮肉，最重要喺佢唔計較，抵得諗，有次我見到有個同事去蒸餾水機斟水，發現冇水，佢竟然返番埋位，當冇去過兇案現場。跟住Tom也出去斟水，他見冇水，二話不說，抬起有幾個啞鈴重的蒸餾水樽換水。平時影印機加紙，printer換炭粉，入lift hold住lift門，果個一定係阿Tom。

你個仔高大得嚟又有少少怕醜文青feel，有禮貌，朝早會主動叫人，同事向他講唔該，佢一定會說唔洗客氣。有熨恤衫，打呔會扣喉鈕，竟然用手拍不用紙巾。再加上佢又熟excel識整電腦聽講拉得一手小提琴，真係冇得輸。女同事每日都圍住他在轉，我開始為Tom的女友擔心，講笑啫，相信Tom是一個專一有責任感的人。

伯母，我想同你講，你個仔堅打得！我望住呢個外星人，問點解咁唔同。相信離不開兩個原因：遺傳同家教。anyway，都是伯母的功勞！(當然朱世伯也有credit！)

不過伯母有一件事，我唔知應唔應該同你講，昨天我接到阿Tom的辭職信，佢話有間跨國公司，俾左個唔錯嘅offer。我知道鬥薪酬同package，我地好難鬥。阿Tom堅係我地做管理的dream staff，如果佢肯留低，相信不出兩三年，佢必是公司的no. two，會有好大自由度去決定公司的路向和市場策略，成就感肯定大過踎係大公司做中層。

我會加多人手，阿Tom以後唔會遲過7點鐘番到屋企同伯母食飯。或者你今晚可以同佢傾下，當然，唔一定要講俾佢知我打過嚟。