返工需要智慧，做人上司更需要大智慧。所謂「十隻手指有長短」，連孖生兄弟性格都可以各走極端，更何況工作上黎自唔同背景嘅同事？帶住成班手足做嘢，點樣可以做到公平服眾真係會考起人，而家就等職場專家醒各位新手上司幾招啦！

盈力僱員服務顧問首席顧問孫立民指，要令下屬感到上司處事公正，並非事事安排到「人人有份」咁簡單：「要達至公平可以運用兩種手段，一種係平均主義，另一種係應得主義。」至於幾時要用邊一種，孫立民就指要視乎上司「分餅仔」時係分咩「餅」，簡單黎講就有以下幾款「餅」：

1. 金錢回報 + 晉升機會

加人工、佣金、分紅以及升職等最直接嘅獎勵，當然要用應得主義劃分，因為咁做細嘅先有動力工作㗎嘛！

2.進修/培訓機會

下屬嘅努力值得得到機會，作為上司梗係要撐佢畀多啲支援佢，等對方獲得更大進步啦！同時，部份職位需要掌握專門技能黎提升表現，例如讓餐廳員工學習更多酒類知識。只要相關培訓係職位所需嘅技能，上司就應該要比下屬報讀。但除咗同事應得，一啲普通嘅職業技能，例如學習普通話咁，都係同事們可以人人提升嘅技能。所以遇上有進修/培訓機會，上司就要平均同應得主義並用啦。

3.重要的事業機會

見大客、跟大project、出trip....阿A想去，阿B又想去，爭崩頭點搞呀？用應得主義，邊個叻就畀邊個去就唔駛多解釋，但作為一個公平嘅上司，亦唔好忘記要用平均主義比其他同事一個「出頭天」。因為一個健康嘅團隊唔應該機會永遠只係畀某部份人攞晒，雖然佢地可能係精英，但如果好嘢永遠畀晒佢地，條team嘅「貧富懸殊」差距就會越黎越大，做成叻嘅同事越叻，能力一般嘅同事就因爲欠缺機會而越弱，咁就唔係一個健康嘅發展啦！所以一啲挑戰性一般嘅機會，例如每年都有的trip，上司就應該畀同事輪流嘗試。

4.褔利

中秋派月餅、節日有coupon、公司T-shirt或風褸等等，但凡只要係員工身份就應有嘅福利，毫無疑問應該用平均主義，人人有份皆大歡喜，做上司嘅就唔會因為分配不均而畀人話「大細超」啦。

5.友好關係

除咗以上種種，一個上司仲可以派咩「餅」畀下屬呢？作為上司，你有無諗過同邊個同事食晏、放工同邊個happy hour、下個禮拜約邊個行山，其實都係一種「offer」，對下屬黎講都係一種非金錢量化嘅回報呢？無一個下屬會唔想同上司保持良好，甚至係友好關係，如果上司開放呢個機會，下屬會恩然視之為一種回報。所以「做朋友」都係一種要妥善管理，影響同事感覺公平與否嘅微妙關鍵之一。

簡單舉例，上司去完旅行返工派手信必需要人人有份，而且要份量、質量均等，因為呢啲位搞唔好就會畀人傳出去「阿頭淨係錫邊個」，「偏私」之名就會不脛而走。

不過問題黎啦，當下屬有不同長處，上司編派不同工作時，同事們未必「心水清」知道原因，可能只會覺得偏私或唔公平，咁上司可以點拆？孫立民教：

「無論如何，同grade同事的工作量在牌面上理應係差唔多的，不過hea嘅同事你唔敢畀嘢佢做，結果做死晒勤力/叻嘅同事，呢啲情況好普遍。對於hea爆同事，你梗係唔敢委以重任，但對於能力高嘅同事，做上司應該要令下屬睇到前景，而唔係無希望咁捱，同時要為佢爭取更好待遇，否則『fit馬』遲早一日遞信走人，損失嘅都係自己。」

能夠做到「人人都buy」可以話係做上司嘅最高境界，各位師兄由今天起慢慢邊做邊學啦！